自由黨喺黨主席田北俊嘅帶領之下，噚日係威係勢去見財爺唐英年，話交流意見喎，但係人都知唐唐原是自由黨人，成班都係青梅竹馬，自由黨條尾點擺，佢自然心有靈犀。
𠵱家形勢好清楚，民建聯嘅曾鈺成做咗「幕後特首」，佢向老董打個眼色笑一笑，老董就會跟隨指令跳一跳；而自由黨就出名「少爺小姐黨」，反咗枱都要笑笑口受番佢哋玩。
行家最關心係周梁淑怡嘅前途，係咪今日會宣布佢阿姐入行會。點知田少話莎姐有排都未返港，冇嘢好講。按行程，莎姐要陪煲呔陪到下個星期一，剛好自由黨周二上京面聖，伏請中央就田少唔生性嘅事件恕罪，所以莎姐到時唔知飛返香港出席首次行會好，抑話直飛首都見京官。
八方問莎姐嘅戰友張宇人，除咗飲食界行情，佢梗冇料爆，只係話到噚日為止，莎姐都係定咗直飛北京。
你畀我都係去見港澳辦廖暉同陳佐洱補鑊緊要過去行會報到啦，話唔定阿爺呢輪心情靚，連國家副主席曾慶紅同副總理吳儀都有得見，為莎姐嘅事業豎立新嘅里程碑，老董點有得比。
傳真︰2623-9278
電郵︰