美國東岸預期在周末前受破壞力極大的颶風吹襲,阿虎唔知會否令美股周五停市,但港股好似預咗美股有人會在周四出貨等打風咁款,恒指噚日先行回吐,一度跌破11000關口,收報11069,跌70點。期指造得更淡,收報11005,大幅低水64點。
黑客話,大市調整,唔止因為驚美股回吐,亦因為有部份中資資金要回流國內。外滙管理局同埋人行已四出查數,睇吓銀行有無違規售滙同貸款,此舉點都會令內地銀行收緊借貸,以及抽走部份資金回國做靚盤數。噚日國企股同中資股好多都跌到阿媽唔認得,中石化(386)同中石油(857)分別下挫6.4%及4%。最近外資已分階段減持中資股,現時連中資都要流走,真係唔知中資股要跌到乜嘢水平才有承接力?
思捷(330)上市十周年,市場預咗公司會有特別派送,不過噚日仍遭拋售,跌3.44%,收21.05元。收市後,公司宣布全年業績賺12億元,派末期息0.325元及特別股息0.30元,合共0.625元,總算不負眾望。不過計埋中期派息0.075元,全年派息0.70元,股息率只不過係3.325%,唔算好吸引。
Cookie話,思捷過去一年股價升咗成倍,其實已偏高,後市重要睇第二大股東摩根大通會否減持,而且美元開始轉強,即係話思捷歐洲業務好難再受惠歐元上升,此乃思捷一大隱憂。
e莉莎噚日問阿虎有冇玩開泰山控股(1192),如果冇就咪手多,至於乜嘢事佢就唔肯講,不過睇隻股技術走勢就有轉弱迹象,在0.32元水平好似托得好辛苦。
阿 虎