一直講咗好耐，但只聞樓梯響嘅旗艦級福士Phaeton豪華轎車，終於有望到港喇！皆因早前受SARS嘅困擾，香港代理唔敢貿然將之引入，加上一班香港用家口味零舍與眾不同，坐得呢個Class嘅頂級豪華轎車，性能重係其次，最緊要反而係款車個台型同設備，當然重要求款車尺碼夠大啦！而剛啱我哋四眼編輯到德國睇過，佢返嚟話畀亞Mark知，福士響法蘭克福車展上，Show咗部加長版Phaeton，賣相吸引有個性之餘，論矚目度重絕不比平治S-Class或寶馬7系為弱；與此同時，亞Mark亦曾向香港代理市場部要員Wilco打探過口風，佢哋都認同香港班用家口味喜歡長陣車嘅偏愛，至於話部車幾時到港？咁大家就要留意吓，佢哋會幾時開始裝修Showroom喇！事關部長陣版Phaeton尺碼非比尋常，唔係咁容易擺入去嘛！