新車速報：<br>頂級積架XJ84.2豪氣襲港

新車速報：
頂級積架XJ84.2豪氣襲港

全新英國積架XJ車系，至頂級並配用4.2公升V8偈嘅XJ8型號，終於正式抵港。新車無論賣相及設備都有上佳水準外，加上出眾嘅性能表現，還有鋁合金車體結構，令新車大可媲美同級德國車呢！
記者、攝影：陳偉林
ImageGirl：Cody

設備講究安全出眾
英國車一向講究裝潢，而呢部XJ8亦唔例外，以軟滑上乘皮革配襯高級桃木裝飾，乘坐既貼服又見賞心悅目，加上豪華至極嘅高級CD音響、左右獨立連前後送風嘅恒溫冷氣，還有免提電話、後排遮陽簾，同埋前後六個安全氣袋及充氣簾幕組合，可謂裝備齊全又富安全感㖭！

■渾然一體嘅中控台上，有齊高級CD音響同左右獨立恒溫冷氣，少不了重有電話鍵盤。

■後排空間寬敞，少不了重有獨立頭枕同三點式安全帶配搭。

■後排大型中央手枕內附杯座同雜物匣外，還有音響、冷氣同免提電話鍵盤。

■大型雙層式首飾箱，擺放文件至適合。

■原廠電天窗前後四個位置，各有獨立照明及扶手編排。

■後排既有獨立送風口，又有電插座及點煙器。

CATS底盤穩妥見安全
新車裝有同級至Top嘅4.2公升V8偈，輸出平均有力之餘，一套先進6前速ZF自動波箱，轉檔反應利落重能讓引擎發揮至極。積架獨有CATS底盤結構，加上氣壓避震同自動平衡高低調節，還有主動式電子TractionControl、DynamicStabilityControl，以及ABS連EBD裝置，令呢部豪華轎車嘅操控性，凌駕不少同級車款呢！

■一套全新6前速ZF自動波箱，轉檔順滑又見直接利落，還輔有Sport模式選擇。

■三個獨立圓表鑲嵌響瑰麗嘅桃木內，既賞心又見悅目易看。

■四幅式真皮軚環轉向輕盈準確，兩旁重附有免提電話及行車電腦資料檢閱按鍵。

線條突出見吸引力
造型線條流暢又悅目嘅全新積架XJ84.2型號，響車身四周嘅電鍍裝飾配襯下，格外吸引又見矚目感；而一對頗有神氣嘅雙圓大燈，襯托響閃爍生輝嘅鬼面罩同「捷豹」裝飾下，重倍見突出㗎！

■捷豹嘅威武造型，至啱配襯響XJ身上。

■車身前後有耀目嘅電鍍裝飾物，予人多一份貴氣感。

■四輪尊貴嘅18吋合金胎軨組合，既穩重又見活力一面。

■銀白電鍍鬼面罩，配襯響捷豹嘅車廠頭飾下，氣派盎然突出。

■一台4.2公升V8偈以雙出式尾喉配搭，有助呼吸更暢順。

記者試後評語：夠豪！表現勁！
頂級版嘅XJ8豪華轎車，引擎輸出強勁又見收放自如，難得重有出眾隔音同寧靜度；匹配埋輕巧堅韌嘅鋁合金車體，以及先進6前速ZF自動波，起跑加速更有恍如一部轎跑車之感。

Cody評語：坐得舒適設備齊
部車外形氣派突出，而車廂陳設響高級真皮同桃木配襯下，乘坐軟滑貼服之餘，重好有一份雍容嘅貴氣，設備更係應有盡有㖭！

積架XJ84.2V8規格
引擎：4196ccV8DOHC
馬力：298ps/6000rpm
扭力：41.9kgm/4100rpm
傳動：6前速自動波，後輪驅動
懸掛：（前）雙搖臂（後）雙搖臂
制動：（前）透氣碟（後）碟式（ABS）
輪胎：235/50ZR18PirelliP6000Powergy
尺碼：5090×1860×1448mm
軸距：3034mm；車重：1615kg
0-100公里：6.6秒；極速：250km/h
平均耗油：10.9L/100km
新車售價：約港幣100萬
車輛提供：積架汽車（25200989）

■新車以一台4.2公升V8偈，匹配最新6前速自動波，起跑加速反應突出又見寧靜度。