政務司司長曾蔭權同經濟發展及勞工局局長葉澍堃分頭喺海外推銷香港，如無意外，煲呔今日人在華府，而阿葉就喺倫敦。
佢兩個此行嘅目的係希望重建歐美官商對香港嘅信心，但係沙士弄人，呢個星期日日都虛驚一場，真係難為我哋嘅香港大使曾司長同葉局長，一邊喺午餐會上叫人唔使驚，香港已經十分安全冇晒事；另一邊又傳來發現懷疑非典個案，咁搞法，就真係講乜都冇用，啲鬼佬有排都唔會再嚟，以後睇怕都要依靠十二億大陸同胞。
當然，香港都唔希望再變疫埠，八方就寧願虛驚好過掉以輕心，講老實話，沙士期間人人戴住個口罩，真係病都少咗，葉局長喺阿姆斯特丹話香港嘅秋天好宜人，可惜天口涼，沙士最容易再現呢。
傳真︰2623-9278
電郵︰