王菲同謝霆鋒呢對情侶，感情危機係新聞，感情穩定去行街街都係新聞，有時都幾悶。噚日分別有兩本雜誌寫佢哋，一本話佢兩個買戒指訂婚，一本就話佢哋喺海逸酒店幽會。
而霆鋒舊愛張栢芝噚日就喺泰國拍完寫真，好開心咁返香港，佢隻手重多咗個公仔，唔知係印水紙定係新紋身呢？問到栢芝霆鋒同阿菲訂婚件事，佢就一於闊佬懶理，睇怕已經對霆鋒忘情。
噚日霆鋒喺九龍塘拍手機廣告時，就話去酒店係同助手飲嘢，喺同一地方出現就話幽會，對佢哋好唔公平喎。至於同阿菲訂婚嘅事，霆鋒話：「我只係買衫、買褲，冇買戒指。」霆鋒同阿菲行街俾人影到相，其實好少有，今次重係佢老闆楊受成旗下嘅雜誌影佢哋，霆鋒竟然話：「又唔係專登，我唔覺得係罪，人哋影到我冇所謂，又唔係殺人放火同偷嘢。」咁又係，照咁講佢去酒店搵王菲都好平常啫，點解又唔認呢？
王菲經理人陳家瑛噚日喺電話度話：「行街又話訂婚，去酒店係為保良局個騷化妝，咁又話開房！」陳家瑛話最勞氣係寫阿菲個女竇靖童曠課，佢話：「童童日日都有返學㗎！」
莫文蔚同台灣女子組合S.H.E其中兩位成員，噚日專登出席台灣音樂頻道HitFm聯播網五周年台慶慶祝會，莫文蔚帶咗一頂限量版安全帽、牛仔褲同化妝品送畀聽眾，而S.H.E成員Ella因為受傷而冇出席活動，莫文蔚就好識做，代替Ella同另外兩個成員扮S.H.E影相，十分搞笑。
張智霖日前接受商台節目錄音訪問，佢講到小學時讀男校，中學就讀男女校，佢坦白承認讀書時拍拖會影響學業，佢話：「由男校轉讀男女校都唔會影響到讀書成績，不過讀中學時都有追女仔，唔係掛住追而唔讀書，但係都覺得拍拖會影響到學業。」
好耐冇露面嘅盧冠庭噚日去金鐘，出席小提琴家西崎崇子嘅記者會，由於西崎崇子將會幫有學習障礙嘅小朋友舉行慈善演奏會，所以自細有學習障礙嘅盧冠庭亦專登到場講吓自己嘅經歷。其實如果佢唔講，都冇人知佢原來有學習障礙，所以佢都話唔會再唱歌，因為驚到時上到台會唔記得晒啲歌詞！
施綺蓮、楊玉梅同邱月清，噚日為尖沙嘴一間新開張嘅服裝店剪綵，大部份嘉賓都係亞姐出身，搞到好似亞姐聚會咁。
早排有傳施綺蓮生咗個兔唇女嬰，但見佢着住貼身背心短裙現身，完全唔似生過細路，唔通佢咁快收到身？施綺蓮話：「其實個BB係我姨媽生嘅，因為佢有事去英國，先留個BB喺我屋企。」
