前晚歐冠盃開波，「絲帶台」及「收費台」同時直播，可能有競爭性，兩個台都做得幾好！
雖然我求大俠前晚專心睇皇馬對馬賽，但間中亦轉台去直播曼聯對彭拿典奈高斯嘅「絲帶台」，發現佢哋不斷喺比賽中顯示其他賽事現場比數，令冇得上網嘅球迷都可知最新戰果。
「收費台」直播皇馬對馬賽嘅衞星頻道，記得上季播歐冠盃波時就經常無顯示比賽時間，令我求大俠成日都唔知重有幾耐完場！不過前晚佢哋終於有番個比賽時間，亦同樣間中喺螢光幕底部提供最新賽果，認真方便！另外，「收費台」嘅衞星頻道喺賽事完結之後，會播返晒同日比賽精華，球迷不妨留意吓！
「郵差」馬龍噚日去咗幫效力緊震動嘅愛女查莉霍特打氣，結果震動爆冷打敗火花捧盃。年近四十嘅馬龍肯定百感交集；自己打咗NBA成十八年，一個冠軍都攞唔到，點知個女第一年打WNBA就捧盃！希望馬龍今季過檔湖人後，可以好似個女咁一嘗冠軍滋味喇！
星期日英超聯重頭戲曼聯主場對阿仙奴，早兩日決定咗執法嘅球證，正是季初慈善盾決賽嘅球證賓納特。當時對賽兩軍正是曼聯及阿仙奴，賓納特喺嗰場比賽就畀咗張紅牌阿仙奴嘅謝菲斯，賽後寫報告亦令蘇甘保面臨停賽三場處分，似乎呢個球證唔係幾利「兵工廠」喎！
車路士嘅杜夫早兩日埋怨領隊雲尼亞里成日下半場換佢出嚟，覺得不獲信任。結果前晚歐冠盃作客對布拉格斯巴達，杜夫連正選都冇份！係咪衰多口呢？另外，原來「車仔」曾經想將祖高爾外借去莫斯科斯巴達！不過佢就寧願繼續留隊做後備都唔肯過去，唔通嫌俄羅斯太荒蕪？
前晚歐冠盃皇馬以四比二打低馬賽，我哋有幾位名家都敲中呢個波膽，馬會足智彩及澳門彩票嘅賠率都有成四十一倍，不過原來外國有博彩公司派彩係六十一倍，似乎港澳兩大莊食水深啲噃！而前晚幾場歐冠盃都由一啲賠率頗冷嘅後衞成為「首名入球者」，唔通呢期吹冷風？