周梁淑怡被傳入行會嘅消息愈講愈似真，一來當事人無否認，二來當事人唔喺香港，同煲呔去咗美國推銷沙士之後嘅特區，所以冇人搵到佢阿姐再問個究竟。
八方聽聞，自由黨中人對莎姐入局填番主席田北俊個位冇異議，亦唔覺得好滑稽，因為呢個係莎姐嘅個人決定，田少當日劈炮亦都係個人行為，唔可以話自由黨就從此與行會絕緣，何況𠵱家嘅時勢同當日唔同；莎姐係旅發局主席，目前嘅主打，點可以同日而語呢？
咁又係，政治呢味嘢冇永遠敵人，只有老董先會一隻蠻牛咁死向前衝，明知前面係懸崖都要跳落去，最後又要死死地氣搵一大班消防員用繩同起重機吊着佢上來。
如果唔善忘，應該記得莎姐喺衞奕信時代做過行政局成員，九一年民主派直選旗開得勝，走上阿厘畢道港督府要權，點知最後益咗周梁同黃宏發，但佢兩人只係做年幾就俾肥彭踢走埋，周梁入局呢個冷河橫跨更年期，一過就十年再撈番起雖然排到凍凍哋，不過點都係駕輕就熟嘅。
傳真︰2623-9278
電郵︰