唔經唔覺，原來葉劉淑儀已經離開官場成個月有多，八方噚日同駐京辦老友傾開，先知原來葉太走之前，暗地裏為喺內地被扣押嘅港人做咗件好事。
話說一直以來，香港人上大陸做生意又好，叫雞揼骨又好，經常出現因錢銀而起嘅糾紛，最後俾人拉咗，扣押好耐都唔審訊，結果一年又一年，變相無期徒刑。駐京辦老友話，一般扣留超過八個月，佢哋就會列入逾期扣押，過去駐京辦為此不停張羅，但係問極消息都冇乜回應。
直至早排，中央關注內地扣押犯嘅問題，咁啱葉太當時上京訪問，駐京辦就順帶要求葉太向內地有關部門提吓呢個問題，內地部門無耐就向香港送大禮，唔夠兩個月，除咗剩番一宗個案未處理之外，其餘逾期扣押個案已經有下文，有啲正在審訊中，甚至有判決，實現自由行放埋返香港都有！八方真係唔敢睇少葉太嘅本事，可以做埋女蘭保，咁嘅人才去美國湊女，真係浪費人力資源，鬼咁唔環保，唔知李少光呢兩日上京，又會唔會向舊上司嘅成就睇齊呢？
傳真︰2623-9278
電郵︰