成立咗二十五年嘅SouthernAllStars（SAS），近期人氣旺盛，重做咗JAL航空公司嘅代言人，咁啱我羅拉早幾日去完日本，搭過呢間公司嘅飛機，喺機艙入面就睇到SAS好搞笑嘅廣告同製作特輯，佢哋又不停狂播SAS嘅新舊MV，原來性感水着女星小池榮子都有喺全新MV入面客串演出。
SAS新歌《想在淚海被妳擁抱》嘅MV拍得認真熱鬧，成隊樂隊最初喺沙灘上面jam歌，然後透過電腦特技走落水底，變成海底奇兵，最令人意外嘅地方，就係突然間有個水着美女跳入水底，喺桑田面前游嚟游去，呢條美人魚正係小池榮子！
小池榮子能夠獲樂壇巨星邀請客串演出MV，證明佢真係有番咁上下地位，佢喺MV入面戲份都幾重，不時喺唱緊歌嘅SAS面前氹氹轉，扮餐廳RollerGirl侍應，又坐喺沙灘曬太陽，甚至扮晒吹色士風，重好樂意咁畀桑田揩油！不過小池榮子始終都要騷吓巨乳身材，搞到我羅拉職業病發作喺機艙狂笑，差啲嚇親空姐同乘客呢！