《哈利波特》暢銷全球，翻譯成多國文字，令作者羅琳成為世界富婆。羅琳本身由窮光蛋變成億萬富豪，算係一個神話故事，大概一百年會發生一次，我哋好難學得到嘅。
但另一位億萬富婆竟然又想打兒童故事市場嘅主意，確令人目瞪口呆。呢位富婆就係麥當娜，大家知道佢多年來縱橫歌壇，個人行為大膽，拍電影就兒童不宜，鍾意就不婚媽媽。照計以佢嘅形像，會嚇怕媽咪，點會鼓勵小孩子以佢為偶像呀？
但係唔好理，有名氣就可以乜都有人支持。麥當娜寫一本四十八頁嘅兒童故事書，到倫敦宣傳，穿密實裝出席推廣會，一出場就謀殺大量菲林。記者追到佢實，電視台猛咁講，書嘅內容未公開，已經轟動全城，問你服未？麥當娜又出新招，公開宣稱話四十幾歲人，想再做媽媽，已徵詢醫生專家意見，佢可否適合「高齡產子」，當然邊個係孩子爸爸，重未選定啦！呢件新聞與佢嘅新書出版同時出籠，大收宣傳之效，真係唔到你唔服呢位妖冶天后嘅功夫。
大明星寫書，點會冇「槍手」（ghostwriter）代筆吖，分分鐘故事大綱都係由「編劇」代勞。如果麥當娜經包裝後可以成為暢銷兒童故事作家，媲美羅琳嘅話，恐怕J-Lo、米高積遜都可以成為小說家詩人咯。
【筆者按】九月十四日講BarryGibb已逝實乃MauriceGibb之誤。