威格斯（中國）前副主席陳家齊離開工作咗十六年嘅公司後，開創自己事業，成立縱橫商業顧問有限公司，英文名GreaterChinaRetailConsultantLtd.,專攻商舖市場，實行做番老本行。商舖市場對佢嚟講，可謂駕輕就熟，不過，今次佢唔單止放眼香港，重進軍大中華，睇佢間公司名就知啦。
佢對蘭西講，內地積極拓展商舖市場，特別係商場嘅空間，比香港大，因為商場面積比起香港大得多。據講陳生已經喺哈爾濱傾成咗一個商場項目，將會由佢間公司負責包裝、招租；至於香港就會負責尖沙嘴美麗華戲院改建商場招租工作。
一九八七年由仲量行轉職到威格斯，一直從事商舖代理嘅陳家齊，今年一月離巢後，二月即成立新公司，香港、北京都有辦事處，香港有七至八名員工，內地約五至六名。
「檀宮」呢個名，究竟係觀光景點，抑或係食肆名？答案係一個上海超級豪宅盤名。
個盤喺上海西郊國賓館隔籬，只係得十八座別墅，但係面積個個都過萬呎，最細嘅都有一萬七千幾方呎，最大重過二萬一千五百方呎，每間別墅重有恒溫泳池或室內外雙泳池、家庭影院、健身房、按摩池、圖書室、中西式廚房，戶外又有私家花園等，氣派夠晒豪華。個盤嘅發展商係上海華麗家族房地產開發有限公司，但就唔知幾時賣，呎價幾多。不過，如果有新料蘭西會第一時間話你。
鰂魚涌逸樺園頂層單位話咁快就賣咗兩個，呎價重屢創新高。代理話太古品牌一向都有唔少捧場客，好似啱啱用千四萬買頂層嗰位買家，原來已經有幾個太古物業收租，包括兩間太古城同埋一間西半山雍景臺，而佢本身都係住緊太古樓，係忠實擁躉。
雖然呢間頂層單位要過千萬，銀碼都唔細，不過買家只係前日下晝上去睇過一次現樓，唔夠半個鐘就扑槌，之後就出咗個好接近發展商要求嘅價錢，到噚日朝發展商正式落實出售，捧場客果然唔同啲，唔使點睇都已經咁有信心。
發展商趁樓市暢旺，加快籌備新盤開售，長實喺元朗錦上路嘅四季雅苑，已經喺旗下屋苑刊物中率先披露資料，連物業嘅外貌相都有埋，加深住戶對呢個樓盤嘅認識。
四季雅苑佔地約二十七萬七千多方呎，地積比率○點四倍，只係起一百一十二幢兩層高洋房，附連天台、私家花園同車位，間隔分三房兩廳同四房三廳連家庭廳設計。另一個賣點就係兩分鐘車程可到西鐵錦上路站，再去美孚都係十分鐘。樓盤嘅示範單位設喺元朗錦田路二百三十三號，重有埋熱線可以查詢，有興趣買就可以去實地視察吓！
另外，金匯投資喺元朗錦綉花園附近嘅一百幢別墅，聽講都部署緊開賣，好快就有眉目。
舖位市道最近氣勢如虹，頻傳成交。業內人士講，因為自由行，商戶有生意做，自然有租交啦！所以啲投資客咪即刻入市買嘢囉，通常最搶手嘅係一啲連鐵約嘅舖，買入即刻有回報嘞，一般有七厘，部份重達十厘㖭。𠵱家連二三線舖都有人傾。
睇番啲住宅，特別係早排熱烘烘嘅豪宅，由於回報只有四到五厘，除非係博升值，唔係較難吸引投資者入市。
蘭西
電郵地址：
