沙士驚魂再令港股波動，恒指上午本來升得好地地，差少少就可以挑戰11200關口，但中午傳出有青山七友發燒兼有上呼吸道疾病，搞到港股由原本最多升118點，一度大幅收窄至4點，最後被證實虛驚一場，恒指反彈，收報11140，升68點，成交143.98億元。
未來一段日子，流感仍會橫行香江，任何一個人有頭暈身㷫，都可能被懷疑為沙士，對港股唔知係好事定壞事。正面睇，市場好快對沙士消息無感覺；負面睇，一旦沙士真的爆發，投資者可能反應遲鈍，沽貨慢三拍，隨時被殺個措手不及。
Cookie話，市場焦點已轉向新股，據聞魏橋紡織（2698）接獲唔少大飛認購，公開發售部份坐底超額10倍，承銷團隨時以上限8.55元定價。不過近期國企股走勢唔多理想，國企指數噚日跌2.16%，中石油（857）與中石化（386）分別跌2.9%及4.5%。唔通股神畢菲特同惠靈頓基金沽石油股換馬認購魏橋？其他同類股如華豐紡織（364）開始摩拳擦掌，似趁魏橋上市認購理想消息炒上，噚日收報1.16元，升2.65%，成交高達7161萬元。
近期市場頻傳出銀行併購消息，電訊業亦唔執輸，噚日傳出Sunday（866）會被併購，刺激股價升9%，收0.36元，成交4538萬元。市場傳買家係電盈（008），電盈禁止經營流動電話業務的限制將於明年2月屆滿，若要重投流動電話市場，併購係最方便，Sunday現時市值10.8億元，電盈絕對有能力收購。
阿虎