車迷期待已久嘅新版富豪S40，終在今屆法蘭克福車展上曝光；新車無論造型、車廂布局以及機械配搭，皆予人耳目一新之感。有興趣嘅朋友，不如一齊嚟先睹為快喇！
響外形設計上，新一代富豪S40與同廠其他車系如S60及S80等十分相近，尤其係車首及尾燈設計最能凸顯出呢個特點；而一組炯炯有神嘅頭燈，襯以闊大鬼面罩組合，亦令新車望落增添一份吸引力呢！
由於新車尺碼較前有所增多（達4468×1770×1452mm），而軸距亦較前增多78mm（達2640mm），故此車廂空間明顯較前來得闊落，加上前後兩排承托力甚豐嘅座椅，乘坐舒適感明顯較前提升不少呢！另外，設備配搭齊全易用之餘，中控台更屬全新及用上超薄式設計，望落份外吸引突出。
推出初期，廠方會為S40車系，安排有兩台分別能輸出140及170匹馬力嘅2.4公升直5偈，以及頂級版T5型號，所採用嘅一台2.5公升直5低壓Turbo偈（220匹），而其後廠方亦會為新車安排有更多引擎配搭供選擇，以滿足用家需要呢！
