經紀陳噚日懶神秘咁打電話畀小初，話有隻超級無敵冷門股仔可留意。呢隻股又真係冷門得交關，叫做明倫集團（346），如果有讀者講得出佢做乜生意，可算係股市通。
經紀陳話，明倫前身係聯大，本來做開聚酯等化工原料，去年8月控股權易手，家陣嘅大股東係一位唔夠30歲年輕國內投資者。
新老闆既然花咁大工夫買殼，當然不甘寂寞淨係搞化工原枓，不過好似話因為礙於上市規則所限，搞到要買殼1年後先至可以做得嘢。
結果真係搞咗1年，明倫最近先公布，打算向一名獨立第三者，購入北京昌東順燃氣公司逾50%股權，收購價則有待進一步磋商。公司預期，收購會以內部資源及可能向銀行借貸支付。
經紀陳又話，雖然明倫話投資燃氣項目，會由內部資源或者銀行貸款支付，不過，據講有人正在市場放聲氣，唔排除搞埋配股集資。最近明倫成交明顯多咗，不妨留意走勢。
慕容小初