講到工作狂，阿董認咗第二，全世界元首怕且都唔敢認第一。粉嶺別墅六年來已經野草叢生，呢頭話佢七年只係放咗四十八日假，應該攞番多啲假輕鬆吓，嗰頭阿董就囉攣心掛掛，放假都要掛住香港，真係難為佢老人家。
阿董上杭州去錢塘江觀潮，撞到李鵬，跟住又Cut短假期，返香港見德國總統，途經深圳，俾國家副主席曾慶紅會見，跟住去上海，本來預定係繼續放假嘅，點知又蒙上海市委書記陳良宇召見，向陳市委介紹香港現況。
最好笑嘅，就係阿董初初玩神秘，唔多肯話放假去邊，保障私隱，點知去到上海，見咗領導人，又主動通知特首辦，叫啲下屬通報新聞界。
呢排香港經濟好番少少，全港市民都額手稱慶，讚緊阿董兩公婆開始學識少蒲頭、多隱形，只要六百萬市民見唔到佢賢伉儷嘅尊容出現喺公眾場合，就會恢復消費信心。阿董去錢塘觀潮，有冇重演《書劍恩仇錄》嘅閱讀心得，香港人唔知，亦唔想知，只係想佢觀潮之外，重潛埋水，令到香港人覺得佢好似「八萬五」一樣終於唔存在嘞，咁大家就會對前途充滿信心。
唔知阿董係咪對最近曾副主頻頻高調會見民建聯、港進聯同埋其他團體，覺得有少少唔自在，途經深圳，蒙曾副主寵召，都要提醒吓傳媒，證明自己喺國家領導人心目中重有少少實力，去到上海見陳良宇、又爆響口，畀六百萬人睇見佢擒上擒落，好似患咗過度活躍症嘅三歲小兒咁，天黑咯，大人催佢上床覺覺豬咯，佢重唔肯瞓，將成屋嘅玩具搬上床，又搬番晒落床，跟住又對住個米奇老鼠大公仔喃喃自語，鬼打都冇咁精神。為人父母睇見咁情形，都咪話唔嚇一驚，要請教吓兒童心理學家，問吓自己個仔究竟有冇事。
其實如果佢醒啲，都應該知道中央喺七一之後重點挺港，挺港唔完全等於挺董。曾副主呢輪突然咁紅，奉咗江主席御旨，睇嚟唐唐都有排得寵。阿董兩公婆若然識得睇面色，就應該企番埋少少，畀唐唐兩仔乸講多啲嘢，唔好咁爭鋒頭。
寓放假於工作，阿董嗰鋪辛勤法，令香港人好心Up。保重吓喇，下次放假去遠啲、去耐啲㖭喇，最好去南美洲阿馬遜森林度吓假，嗰度連Fax同長途電話都冇，唞番三幾個月，香港嘅經濟就會全面復甦喇。
傳真︰2623-9278
電郵︰