昨日下晝，又有沙士驚魂，好在只係虛驚一場，但午後行情已曾一度急挫近百點，尾市做番上去，惜未能高收，恒指升68點，報11140，期指全日表現都較強，低水收窄到只得5點，大市成交則增至近144億元。從成交同期指表現看，仍有熱錢流入，後市可睇高一線。
地產股仍強勢，新地（016）同長實（001）都升1.25元，鷹君（041）繼續有追捧，搶上8.35元高收，升6.3%。
近期樓市明顯好轉，新盤閃電售罄，加上政府在10月又會有救市新招推出，地產股重可以睇好。筆者早前講過，若要將恒指推上高位，必須出動兩張王牌，就係中國移動（941）同滙豐（005），近日中移動似已發力，有大行就推介可以玩一轉，在突破21.4元阻力時跟進，上升目標為23.5元至24.0元。
噚日推介兩隻股票，華脈（499）同滙漢（214），前者小跌0.3仙，後者則大升21%，基金來的果然係堅料。其實華脈正在轉型中，日後有機會食大茶飯，係刀仔鋸大樹嘅對象，現水平入市，以近期低位16仙為止蝕，上望可以23仙為目標。
食過翻尋味，再向芬佬攞料，佢就推介冠軍科技（092），話此股不鳴則已、一鳴驚人，佢哋心目中認為此股起碼可見2.5元，以家吓科技股熱潮開始翻起之際，呢個目標價並唔算奢望。
冠軍噚日收1.66元，升4仙，成交1466萬股，大增逾倍，似有開車之兆。睇番張大圖，由去年6月開始，冠軍走勢形成一個好圓滑的大型圓底，上月中破位而上，衝上1.72元，跟住掉頭回落，在圓底頂部獲得支持，係一個好典型嘅後抽，噚日再起動，只要衝破1.7元阻力，大升浪即可確認，上升目標指向2.3元。
冠軍股價係咪偏低，主席簡文樂最清楚，佢喺9月1日同9日，分別增持839萬同500萬股，佔發行股數近2%，冠軍03年度（6月年結）業績就快宣布，估計每股盈利有0.4元，PE只係4.1倍！重有，冠軍每股資產淨值5.23元，現價大折讓70%！
郭兆誠