喺香港，隨時都可以食到新鮮海鮮。但係北極蚌、護士鯊魚肉、8吋長嘅蟶子皇等刁鑽過癮海鮮，莫講話食，聽都可能未聽過。LeiCafe最近搞嘅環球海鮮美食巡禮，就由世界各地運嚟呢啲刁鑽海鮮，再用西式烹調方法炮製，去西貢食海鮮食到悶，不如試試新口味。
記者：馬慶武
呢隻菲律賓出產嘅蟶子皇，比起街市賣嘅蟶子大兩倍有多，肉質爽甜，不過配上用蒔蘿、海鮮上湯煮成嘅蒔蘿香草汁，有點蓋過蟶子嘅鮮味，若想試清楚蟶子皇嘅鮮味，選清湯白灼較適合。
出產自加拿大近北極深海水域嘅北極蚌，香港非常罕見，肉質肥美，最特別係以鬆化嘅酥皮包着，雙重口感享受。
電話：23983603
地址：旺角彌敦道639號雅蘭中心地庫一層「利佳餚」