下晝個市散過一輪，恒指最低嗰陣只升得6點，埋單有68點進帳。青山醫院有7個病人有事，惹來虛驚，原來只係患上傷風感冒。
面對沙士疑雲，個市忽上忽落，唔想血壓上升，一係唔賭窩輪，一係揀啲相關正股冇咁神經質嘅。滙豐（005）波動，冇咁神化，個勢向上，昨收102元，爬高50仙，呢輪，中銀（2388）意氣風發，若然發得有理，滙豐都會有得去。期指形勢好倉盡在大戶手上，大戶想搵錢，撐住指數，最佳做嘢對象又係滙豐。所以話滙豐個勢向上多過向下。
想有一定爆炸力，搵滙豐Call輪炒，始終離唔開近期推介嗰件9845，12月到期，輪價79仙，溢價0.9%，槓桿率12.9倍，昨日成交125球，大增45球。交投旺，贏錢走人唔難，輸錢投降亦易。
電訊股繼續有得睇，相信又係有人頂住重磅股，令指數好好睇睇。中移動（941）升35仙，Call輪9861升7.4%，收36.5仙，吼低位收集。電盈（008）升7.5仙，收4.975元，近期新聞多多，靜唔落去。有機會撈啲相關Call輪，應該有錢可搵。正路對象始終係9791，昨日未有跟隨正股上升，反跌2仙，收78仙，啱價買。隻輪明年3月夠鐘，溢價6.1%，槓桿率6.4倍。
章盛