大閘蟹系列 三之二
Calvin嘅家人經營食肆，自小已培養出對食的濃厚興趣；長大後讀設計，喜歡研究上海文化；就係呢兩種因素令到Calvin繼承家業之外再開設一間上海菜館。
Calvin𠵱家每兩、三個月就會到上海試菜，吸收新事物，從而創製出一系列新派上海菜，當中包括以下介紹嘅新派大閘蟹菜式。
記者：馬慶武 攝影：周旭文
逢星期一至五出版
可能自小常到父母開設嘅北方小館幫手，所以曾修讀室內設計嘅Calvin除喜歡設計藝術外，對飲食業亦有濃厚興趣，數年前父母準備退休，Calvin便順理成章繼承家業進軍飲食界。「我睇過好多關於江浙文化嘅書，亦去過上海好多次，被上海一帶嘅文化吸引住。」𠵱家Calvin最少每三個月到上海一次，睇吓當地上海菜館有無新菜式，旅行順道取經。
喜歡上海文化，全因為Calvin覺得上海人認真，適應新事物嘅能力強：「上海人認真，所以煮上海菜嘅師傅最講究廚藝，由刀法到各種烹調技巧樣樣了得。而不斷推出新菜式，亦都代表咗上海嘅創意空間好大。而且江浙一帶盛產文人藝術家，呢啲人最識食，饞嘴過好多有錢人，上海菜有咁多好嘅菜式都可能係受佢哋影響。」不過Calvin對上海人亦有不滿之處：「上海人太算死草，同佢哋做朋友感覺認真麻麻。」
喺上海，上海菜已經分為兩派。一派係「本幫菜」，即係傳統製法加傳統材料，死守舊式上海菜，有堅持但缺乏創意。而另一派就係Calvin較崇尚嘅「海派」上海菜：「𠵱家當地人好興講海洋文化，意思係可接受新事物嘅空間、容量同海一樣咁龐大，『海派』就係吸收咗不同地方菜式文化，經過改良嘅上海菜。」所以「海派」上海菜時常都會有新菜式登場，而不少Calvin試過覺得好味又有創意嘅菜式，𠵱家亦可以喺佢呢間上海菜館食到。
口感有啲似魚蛋，有少少彈牙，不過多添一份香滑。原來白玉球係由魚肉混合豆腐打成嘅，再加上大閘蟹粉及蟹肉散發嘅濃郁蟹香味，口感同味道一樣令人滿足。
呢味大閘蟹菜式擁有一個優雅嘅名字，當中嘅明月係指墊底嘅蒸蛋白，而配料則全部用上海上鮮，包括蟹肉、蟹粉、蝦、海參等。Calvin話呢味菜式概念嚟自傳統嘅蟹粉豆腐，不過棄用豆腐改用蒸蛋，更香更滑溜。
用大閘蟹粉加上老雞、火腿等熬製成超鮮甜上湯，再將用魚肉加豆腐打成嘅漿「滴」進湯內，呢味被Calvin形容為「半湯半菜」嘅魚米湯可謂創意十足。
炒蝦蟹雖屬傳統菜式，不過一樣加入新意思，Calvin將呢味炒蝦蟹混合京式風味，配上薄餅同食。用煙韌薄餅包住爽口嘅蝦肉、蘆笋，加埋份量唔小嘅大閘蟹粉、蟹肉，滋味。
蟹粉、蟹肉之下嘅津白絲，咬落爽口清甜，撈麵食口感特別之餘更清新，大大減輕大閘蟹帶嚟嘅膩口感覺。
Calvin話食大閘蟹飲花雕就最啱不過：「上海菜最啱配花雕呢類和酒或者紅酒，唔會太濃烈但酒香可以延續長時間。而且大閘蟹始終係海鮮，點都會有少少腥味，飲啲酒就可以中和一下，食落啲膏會香啲，鮮味啲。另外因為大閘蟹比較寒涼，食完飲番杯薑茶就更好，遲啲我哋都會供應。」
地址：將軍澳新都城2期UG001-003號舖
電話：31522128
營業時間：上午11時至下午11時
