唐英年風塵僕僕，上任以來不斷外出，好似冇時停咁，佢今朝由墨西哥飛返香港，相信可以真真正正坐低做吓案頭工作。
據唐公子新聞秘書講，唐公子做兩日署理特首期間，應該冇乜公開活動，佢周四重鬼咁勤力，會見自由黨、前綫同埋工聯會，交換意見喎。其實唐公子重想見好多人拜拜地主，但係冇時間，所以佢已經下定決心，暫不外訪，坐喺香港做吓嘢。
唐少咁辛苦，佢阿媽又上咗京見領導人，八方擔心佢湯水不足，點知有人提醒八方，唐媽媽一早有見及此，所以借咗個工人畀唐少，今日一落機，肯定已經有湯水侍候。
有啲口痕友話：香港人好命苦，啱啱等得到董夫人收聲落場，又輪到「佘太君」唐媽媽教愛子理財（第一招就係教佢搬新屋），睇嚟香港人真係同一啲有權力嘅老女人好有緣！
傳真︰2623-9278
電郵︰