政府一方面喊窮cut支出，一方面狂灑金錢請老餅樂隊來港，貼錢「包底」都肯制。官員有OL心態，美容瘦身使費唔會慳，但唔會捐錢做公益。政府吝嗇花錢在零經濟回報的福利與教育上，唱好扮靚粉飾門面，卻捨得掟錢。政府有銀用，未來必定洗腳唔抹腳、財散人安樂，搞埋下列活動：特區小姐選舉。叫電視台收爐，等民政局擔大旗，由何志平穿起阿叻那條小三角（也可以遷就體型，改穿大豬三角）褲做司儀，全部佳麗爭逐唱好，公開挺董。評判一個民主派都冇，由董1A與愛國婦女團體俾分。第一屆特區小姐選舉，聽講已經密鑼緊鼓撻着火，消息人士指，內定的冠軍人選，應該是隨時回流跟fans後會有期的變種掃把頭。
愛國大遊行。唔使審，是好事變好事，民政局牽頭，港九社團團體輪流協辦，逢周末周日出動，遊走全城，搞活愛國大串連。活動幾時停？當然撐硬，跟老董與時並進為止。
官方喉舌。雖然已經有，但不夠喉，索性用庫房大水喉射住全新的官台、官報，由董班子操控，宣傳機器不計收視，不計成本落重藥洗市民腦，效果同利巴韋林醫治沙士差不多。千金散盡，老董清盤玩完，2007接棒那位，一褲都係蘇州屎。若然唐英年上位，佢幾英都假，英年始終有限。