唔少人都想喺市區搵個特色單位住，可以考慮華寶實業跑馬地御駿居。聽集團主席兼保良局總理李雨川講，塊地係九九年用三千幾萬買入，連補地價同埋建築費等，成本近一億。原本諗住出租，見到近排個市氣氛好，所以改為出售。
呢個盤特別之處，係鬧市中嘅低密度新盤。全幢得八個單位，地下同頂層係複式單位，面積介乎二千六百幾至三千二百七十方呎，中間樓層係逾一千方呎分層單位，重有子彈形升降機。
禮拜五會先推出二至四個分層單位，呎價約六千六百蚊。由於個盤設計多元化，𠵱家有準買家出價一萬蚊一呎洽購頂層複式。獨家銷售嘅中原地產，營業董事蔡佩芳估計，一兩個月內可以賣清。除咗呢個盤，聽聞華寶實業喺南區持有四十幾個單位收緊租。
旺角大型商業項目朗豪坊，有寫字樓、商場同酒店，發展商鷹君集團，噚日同首個大租戶娛藝院線（UA）簽定租約，請嚟六十年代荷李活性感女神瑪麗蓮夢露——係瑪麗蓮夢露嘅蠟像。
娛藝院線將會喺朗豪坊商場八樓，開設一間有六個獨立影院，提供一千二百五十個座位嘅戲院，今次重係娛藝院線，首間設喺旺角同尖沙嘴區嘅影院。所以鷹君勞師動眾，向香港山頂杜莎夫人蠟像館借出瑪麗蓮夢露蠟像幫助宣傳。
不過，商場未招租，兩個月後至推出，寫字樓部份要到年底至明年初招租，項目預期明年落成。但當大家途經物業現址時，不妨留意吓，因為發展商造咗八款以瑪麗蓮夢露人像做背景嘅廣告板。
放寬內地人士來港旅遊後，市面轉旺，而且時時聽到有內地客入市買樓。除咗住宅，佢哋原來對商廈都有興趣。
一個持中國身份證，嚟自東莞嘅買家，喺內地從事貨運生意，睇中葵芳商業中心一個高層寫字樓單位，七百零二方呎，即時攞出一百二十萬現金，一次過找數，非常豪氣。
不過，發展商話唔收咁大量現金，買家惟有先兌換本票，至可以完成交易。
內地大豪客，已經成為本港發展商推銷嘅對象，長江實業紅磡海名軒後日展開內地巡迴路演，首站係上海，次站北京，明年春節則進軍東莞。置業國際同中銀香港，會送厚禮畀買家。
置業國際送五萬蚊置業利是、雙人來回上海頭等機票，三晚紅磡海逸酒店住宿。至於中銀，送五萬蚊置業禮券、特別優惠按揭利率等。今次新聞發布會，有近五十家內地傳媒表示會出席。
長實今次只係攞十八個海名軒單位去上海推介，但宣傳搞到咁大陣仗，會否太誇張？原來一個單位已值一千五百萬，總數涉資兩億七千萬，計落絕不誇張。
長實執行董事趙國雄噚日充當記者，向身邊嘅下屬何雨盈發問，今次推幾多單位？每呎幾錢？套現幾多？又話自己有潛質做記者。老趙唔通想轉行？
自由行帶旺零售業，吸引投資者將資金由住宅轉投舖位，中原商舖部助理營業董事黃金鳳話，一住宅投資者，見舖位租金回報肥美，原本已傾緊一個葵荃區舖位，咁啱自住嘅加州花園洋房以三百二十萬賣出，即時再傾多個舖。兩舖位短期內可落實成交，總值六百一十萬。
佢𠵱家租住嘅加州花園洋房，面積大幾百呎，月租只係萬二蚊。聽講，呢個客持有不少單幢樓同唐樓收租，由於係優質客，銀行畀佢嘅利率係優惠利率減二點五厘。
黃金鳳話，近排多咗投資者出售住宅套現，剛剛可以轉買三四百萬蚊嘅舖位。因為舖位搶手，部份業主開始反價同封盤，睇定先至賣。
蘭西
電郵地址：
