車路士球星比堤、加拿斯同新加盟嘅馬基列尼三個法國佬，同埋意大利嘅岩布斯奧，喺禮拜上機去捷克備戰布拉格斯巴達嘅歐冠盃前，響機場得閒冇事做，就走入麥當勞坐下；好衰唔衰佢哋連杯嘢都唔飲齋坐，阿嬸見到好唔滿意，叫佢哋離開，搞到呢四個大男人唔知好嬲定好笑，總之就一定係好狼狽。
我求大俠以為俄羅斯油王阿巴莫域治係咁掟錢入車仔，班球員嘅名聲喺英國可以拍得住曼聯同阿仙奴，點知原來連麥當勞阿嬸都唔識佢哋，重將佢哋趕出門口，真係球壇笑話。之不過呢四個人今次有咁好笑嘅遭遇又真係離譜啲，所以話，呢個世界唔係有錢就大晒㗎。
睇國際米蘭公布出戰阿仙奴嘅名單，韋利受傷無份就唔出奇，但烏拉圭前鋒列高巴都無份就幾令人意外；話晒前線正值用人之際，無理由唔使佢隨隊。據報佢根本無傷病，早排為烏拉圭上陣亦踢得唔錯；佢今季都重未為國米上陣過，睇怕佢響國米時日無多。
以為列斯上仗作客𡁻米杜士堡，噚晚可贏主隊升班馬李斯特城，點知淨吞四蛋，領隊列特重好似冇乜所謂；我求大俠就話佢領軍本領見晒底就真，於是啲球員都冇晒鬥心，新兵後衞洛基祖利亞完全未適應英式足球，咁睇落去列斯同列特呢個「雙列」組合隨時凍過水。
嗰邊廂列斯踢到咁差，李斯特城就靠前鋒迪哥夫入咗兩個靚波大勝；迪哥夫出身阿仙奴，之前喺曼城幾屆都冇乜表現，佢賽後話自從福士做咗蘇格蘭領隊後，令佢進步神速。我求大俠計一計，佢過去一年代表蘇格蘭對好弱嘅法羅群島兩次，成績只係一勝一和，咁都有幫助？
上季NBA總冠軍馬刺將會喺星期四下午參觀白宮，接受美國總統喬治布殊祝賀，連上季馬刺嘅超級後備，中國球員巴特爾都受到邀請；可惜「大巴」𠵱家喺哈爾濱備戰亞錦賽，錯過遊白宮嘅機會。如果唔係，我求大俠就可以睇吓昂藏七呎嘅中國巨人企喺喬治布殊面前有幾威！