未曾試過響積架族譜上出現過嘅旅行車型號，終響最近舉行嘅法蘭克福車展上現身，而且重係由備受車迷追捧嘅X-Type車系演變出來；從外形而言，新車車首設計與現行四門型號相同，但由於改用Wagon旅行車款式設計，卻予人有另一番感受，並能令呢位英國紳士展現出實用一面。至於車廂布局方面，全新X-TypeEstate旅行車亦展現出英式豪華轎車風範，不但擁有承托力十足嘅高級真皮座椅外，後排座椅更可按需要收摺放平，以增加尾廂載物容量，而低重心車廂設計，亦方便提存儲於尾廂嘅物件呢！
另外，廠方亦為用家提供有多個引擎配搭選擇，當中包括2.5公升（194匹）及3.0公升V6（231匹）電油型號，性能表現絕對毋庸置疑。新車將於明年初正式推出，大家不妨拭目以待。