令好多影癡等到頸都長嘅《危險人物》鬼才導演昆頓塔倫天奴（QuentinTarantino）終於再有新作，今次由佢自編自導嘅新片《標殺令》，真可謂萬眾期待。由於MIRAMAX對套片信心十足，所以決定將《標殺令》分為Volume1同Volume2，好在套片嘅Volume1鐵定下月十日美國、香港同步上映，本地影迷唔使等得咁辛苦喇。
塔倫天奴其實一早已鎖定奧瑪花曼（UmaThurman）飾演一流殺手新娘子角色，但奧瑪前年懷有身孕，塔倫天奴不惜等足一年時間，等佢去年三月生完BB休息三個月後，再喺二百七十個拍攝日橫越洛杉磯、東京、沖繩、北京、墨西哥不斷趕工。
而深愛中國功夫嘅塔倫天奴，因為係李小龍迷，所以將李小龍喺《死亡遊戲》嘅經典黃色戲服，套喺身手不凡嘅奧瑪身上。今次幕後班底都係強大陣容，除咗袁和平任武術指導外，日本著名打星千葉真一就教授武士刀同有份演出。
片中重有由製作《攻殼機動隊》嘅ProductionIG操刀，同埋由《多重人格偵探》嘅日本著名漫畫家田島昭宇做設計嘅卡通場面，真係好令人期待