當人人以為阿董終於諗得通，聽得明溫總嗰一句「香港是面向世界的香港」嘅時候，特區政府一炮八千萬，請滾石樂隊嚟香港表演，又惹來裏通外國、用公帑益鬼佬過氣樂隊嘅爭議。
投資推廣署署長、扒逆水過戶轉passport做咗「中國人」嘅盧維思，一心諗住搞新思維，點知就煩勞夾冇癮。佢擒日解畫，提出咗兩條連張五常都未必明解嘅理論，一條叫basefee，一條叫flatfee，猛咁話乜嘢叫做除笨有精。
盧同胞話，啲傳媒亂噏，唔係八千萬搞場演唱會，而係一場綜合娛樂大騷，重包埋一套一小時嘅短片，裏面影住滾石嚟香港演完唱，重遊埋山頂、去海鮮舫、同埋去廟街睇劏蛇劏水魚，當做一個旅遊宣傳影視作品，年尾喺美國ABC電視台播放。
換言之，八千萬貼出嚟，包埋呢條旅遊片嘅廣告效益，盧同胞話，你哋咁重不滿，逢董必反，下次唔好再搵佢搞呢啲嘢。
不過話時話，人哋套全球勁收嘅《盜墓者羅拉》第二集《生命之匙》，三分之二外景，都喺香港拍，成套戲由荷李活自己打本，包括香港演員任達華嘅片酬。照盧同胞咁講法，豈不是下次應該由特區政府包起晒呢類戲所有製作費，由納稅人出錢，請全世界觀眾觀賞香港仔及漁港，同埋空中飛人喺中環嘅八十層樓跳落嚟嘅慢動作宏觀鏡，令到全世界都知道香港係一個傳統與現代結合嘅動感之城？
滾石呢支老餅樂隊，主音歌手米積加，今年啱啱做完六十花甲大壽，連阿董都只係癡長佢三幾年。米積加試過喺美國藏毒罪成立，判監三個月，八千萬貼一名高齡道友嚟香港獻世，咁又點向香港班反賭波嘅道德團體，同埋以私生活不檢教壞青少年為理由，否決喺香港興建李小龍紀念館嘅區議員交代？
滾石樂隊充滿懷舊色彩，觀眾平均年齡，睇怕都有五十五歲，好似上次盲仙荷西嚟，喺會展中心開騷，全場好似耆英敬老特別節目，只適合後生嗰陣熱衷於西方流行音樂嘅司局長買飛入場，緬懷當年夾band媾女嘅花樣年華。至於自由行嘅內地遊客，睇怕都會覺得睇番瀋陽雜技團喺新光演出，較為親切少少，就好似喺金紫荊廣場睇升旗禮一樣嘞。
傳真︰2623-9278
電郵︰