港股又經歷一次沙士驚魂，恒指最低嗰陣散咗120點，埋單反升78點，重越萬一點。電訊股中，電盈（008）炒落後，收4.90元，升幅3.2%，電盈Call輪生猛。
中移動（941）最低掟到落20.30元，收21元齊頭，熱門Call輪9861最低28.5仙，收34仙，有10%進帳。中移動個勢都係上緊，但上升過程中難免會有反覆，吼住喺忽然回軟之時，趁低收集9861。隻輪𠵱家數據，其實幾靚，12月到期，輪價34仙，溢價1.9%，槓桿率6.2倍。
老牌紅籌生猛，華創（291）升4.2%，中信泰富（267）升1.9%。中信落後啲，搵佢嘅Call輪炒兩轉，唔憂冇茶錢。
中信Call輪9599吼低買入，隻輪11月到期，輪價11.6仙，溢價2.4%，槓桿率13.9倍，溢價唔高，爆炸力強。另1隻比較冷門嘅Call輪9604，其實可能重靚，11月底到期，輪價20.8仙，負溢價0.4%，槓桿率7.8倍，交投少，用嚟炒唔多好，唔怕坐盤坐耐啲則可以諗吓。
恒生（011）收88元，跌1格，隻Call輪9911，有平嘢不妨執少少，隻輪明年4月到期，大把時間，輪價34.5仙，溢價2.6%，槓桿率25.5倍。正股未來半年若然起13%，隻輪會彈升2.6倍。
章盛