倪震將會幫商台開咪就係人都知，但近日商台播出宣傳聲帶話嚟緊周慧敏同雷頌德會主持新節目，馮仁昭即刻打去商台八吓，係咪周慧敏事隔十二年後再做ＤＪ，同倪震齊齊效力商台啦？點知商台懶神秘，話下個禮拜會有公布喎。馮仁昭追查之下，原來周慧敏開咪係假嘅，只係宣傳橋，開咪嗰個係倪震同張燊悅先真，佢兩個將會幫商台主持一個類似盡訴心中情咁嘅節目，逢星期一至星期五夜晚十一點開始，頂吳君如主持嘅「嘩嘩嘩！打到嚟！」嘅時段，畀聽眾抒發愁懷。
但宣傳竟然用佢哋嘅另一半作招徠，商台咁樣似乎有欺騙聽眾之嫌，搞到班周慧敏fans空歡喜一場，話時話呢條橋都幾低招，好易激嬲人。
其實周慧敏淡出娛樂圈後好少露面，為咗今次倪震開咪，佢早前竟然肯同倪震以情侶姿態出席電影首映禮，𠵱家重出埋名幫手做宣傳，真係唔話得。至於張燊悅同雷頌德呢對，佢哋拍拖咁多年雖然係公開嘅秘密，但張燊悅為咗演藝事業，一直唔肯認兩個嘅情侶關係，𠵱家為咗個電台節目，又肯公然用男友個名嚟宣傳，佢嘅心態真係五時花六時變。
陳慧琳（Kelly）噚日到美孚接受Roadshow訪問，對於港府用八千萬元包底嘅「維港巨星滙演」，竟以高於市價三倍嘅價錢請滾石樂隊（TheRollingStones）來港表演，Kelly話：「咁係咪已經請咗呀？咁請咗都要畀㗎啦！咁咪睇得盡情啲，睇夠值八千萬為止囉，每個人都帶四隻眼去睇，帶埋嘢去錄，之後翻睇再翻睇，去睇嘅就唔好諗唔開心。」
鄭裕玲（嘟嘟）之前主持嘅清談節目《不一樣的對話》，推出後一直叫好，無綫決定再開第二輯，噚日就喺將軍澳電視廣播城錄影，請到田北俊做訪問，佢重因為唔識路遲到，要嘟嘟姐等佢。
嘟嘟姐又話：「做呢個節目除咗想訪問政界人士之外，都想訪問番娛樂圈中人。」
噚日朝早突然傳出狄龍撞車身亡消息，記者都即時打電話畀狄龍個仔譚俊彥問佢發生乜事，譚俊彥澄清冇呢件事，重話爸爸𠵱家坐喺佢身邊。狄龍接過電話同記者講，呢次誤傳唔排除係有人別有用心，佢唔想關心佢嘅朋友同Fans擔心，所以希望唔好誇大報道件事。佢嘅外甥女林珊珊聽到都好擔心，佢話：「唔係啩！有冇搞錯㗎？等我即刻搵吓佢先。」其後才證實是虛驚一場。
曹敏莉、楊洛婷、戚黛黛、李詩韻及李嘉怡幾位應屆港姐，前日從香港出發去成都進行為期十多日嘅親善訪問，五位港姐前晚到咗成都，佢哋都精神奕奕，重得到大會安排咗成都小姐嚟接機，成都小姐遇到香港小姐，佢哋嘅話題唔知會唔會圍繞交流一吓扮靚心得呢？
