中秋節日遇啱九一一，美國人悼念世貿中心，亞洲華人慶祝人月團圓。當日下午五時許，中環已經開始少晒行人，跳上的士，去邊度都塞餐懵，條條隧道都排長龍，難得司機夠幽默：「唉，早知就行西隧啦！」鬼唔知，行西隧零舍貴啲，好多人明知會慳時間，但就係唔捨得。實際上，塞車起嚟，行東隧去沙田要成個鐘頭，車錢兩百幾，由西隧去沙田，價錢差唔多，只須半個小時。左丁山有時去馬場，就因為心理上要慳，要行紅隧或東隧，一碰上大塞車就𤷪𤺧，𤷪埋自己唔夠「經濟理性」，付同樣金錢而慳番半個鐘，你話選邊樣吖？
不過有啲香港司機唔多識行路，叫佢經青衣北去城門隧道，好幾次司機都去咗青衣南或者落葵涌，塞到㷫合合，一位司機重搞笑，飛快過咗西隧，佢就剷咗去旺角方向，走入窩打老道，蝸牛咁慢行去獅隧，交完最貴隧道費之餘，竟然塞番去獅隧，乘客有乜辦法唔撞火。
講咁多牢騷，皆因中秋節大塞車，阻頭阻勢之至。諗番轉頭，中秋節都唔塞車，香港就弊咯，市面一定十分蕭條，而今人人有車揸有錢搭的士，大好事啫。香港經濟復甦有望。聽朋友講，曼谷最近塞車盛況已回復九七金融風暴之前，當地人塞得十分高興，或者我哋都要忍讓吓，歡迎大塞車。