四十九歲單親媽媽李女士，勞碌半生，多年來含辛茹苦維持一家五口生計。可是自去年陷入失業泥沼後，李女士在求職路上一直未見曙光，近月她更飽受手腳舊患復發及腰骨痛折騰，又因面對催交欠租困境患上情緒抑鬱，現正接受精神科治療。蘋果日報慈善基金即時撥款紓困。
面容憔悴的李女士，向到訪記者幽幽地說﹕「我舊年冇嘢做之後，身體就開始出現毛病，首先右手關節痛，令隻手做唔到嘢，連用少少力都唔得；跟住右腳嘅跌傷舊患復發，翻風落雨嘅時候痛得最犀利；前排再加埋腰骨痛，痛到要不斷去睇醫生打止痛針。」
面對失業厄運，令李女士精神緊張、情緒深受困擾。「我嚴重失眠，好擔心唔知點維持頭家，愈諗個心愈放唔低，每晚都無辦法瞓得着，日頭就覺得心翳，又頭痛得好緊要。醫生話我患情緒抑鬱，要我定時食藥同住院留醫，但我留醫只會更加擔心屋企，所以好快就要求出院。」李女士苦着臉訴說。
自丈夫離家不知所終，李女士多年來靠一己勞力養兒育女，曾先後從事小販、食肆外賣送飯、保母等。
奈何近年市道不景，早前李女士飯碗不保，自此加入失業大軍。「呢兩年我全職幫人湊BB，但經濟環境差，好多家長失業後都自己湊番BB，令我搵唔到食。」
李女士續歎道，失業初時她尚可靠積蓄支撐生計，但長久復工無期終令她陷入嚴重經濟困境。「我用晒啲積蓄，就問朋友借錢，加埋借咗唔少，𠵱家已經好難再借到錢應急。」李女士黯然說，四名已成年子女不是失業就是收入不穩，家庭經濟實在非常困難。
在無計可施下，李女士近日透過基督教家庭服務中心向本報求助。「食方面我可以買菜做餸，用最慳嘅方法；屋租開支就好難節省。屋邨辦事處職員已經催我盡快交上個月同今個月租金，加埋呢兩個月嘅電費、煤氣費同水費等幾筆欠債，令我好彷徨！」李女士直言。
蘋果日報慈善基金了解李女士的苦況後，即時撥款一萬元，紓緩其經濟壓力，助她應付短暫生活急需。
捐款編號：C1107
暖流熱線
電話：29908688
傳真：23702192
電郵：
網址：
