香港出現SARS疑雲，好彩最後證實只係流料。港股噚日先跌後回升，收報11071，升78點，成交117.79億元。
香港呢單懷疑SARS個案，一時話呈陽性，一時話呈陰性，跟住又話SARS可以有假陰性或假陽性，真係唔俾佢嚇死都俾佢玩死。
小小超威脅話，電盈（008）投唔投資香港，要視乎港府會否批准撤銷電盈的商業固網市場支配者地位。呢單尚未搞掂，佢嘅副手JackSo就已經出嚟話，要連住宅固網支配者地位亦一併申請撤銷，而且重好似好有把握。電盈嘅股價，近期表現又確係幾標青，日日成交過億銀，噚日升3.16%，收報4.90元，成交達3億元。唔通電盈真係可以心想事成？
千禧智慧（724）單日勁升119%，不過成交唔多，只得5.35萬元。Cookie話，公司主要在國內生產打火機，而歐盟決定終止對中國傾銷打火機調查，對千禧智慧當然係好消息，炒家雖然明知冇人會跟，都要走出嚟Mark高股價慶祝吓。
近期港股成交上升，證券經紀股大幅造好，其中時富金融（8122）由低位反彈逾5倍，噚日收報1.04元。黑客話，此股一直傳賣盤，近期港股炒風吹至，正好畀機會時富投資（1049）將佢吊高嚟賣。
事實上，目前唔少投資者傾緊收購證券行，時富金融隨時會傳出股權易手嘅消息。不過，隻股似乎升得過急，累積升幅大，即使有人提出全面收購，現價追入，水位可能有限，阿虎不敢寄予厚望。
阿虎