梵蒂岡於二○○○年十月一日中國國慶日冊封一班中國人做聖人，呢件事搞到北京好嬲，中梵關係都因為呢件事而雪上加霜，不過究竟為乜梵蒂岡會揀呢一日封聖？天主教香港教區主教陳日君喺噚日一篇《金融時報》訪問入面解開呢個謎，原來一切都係教宗身邊一個私人秘書唔小心搞出嚟。
陳主教話原先梵蒂岡定咗十一月一日天主教嘅諸聖節進行封聖儀式，但係教宗身邊一位波蘭籍私人秘書睇睇吓唔多掂，佢查完日曆之後話，羅馬十一月成日落雨，唔係咁好，不如提前喺十月一日啦，由於佢冇諮詢，結果定咗十月一日封聖，但最好笑係十月一日當日，羅馬竟然落大雨，人算不如天算，又再證明係啱嘅。
主教喺訪問中又透露咗同政務司司長曾蔭權一段往事。話說煲呔由財政司司長「升正」公僕一哥前，曾向主教講述此事，當時陳主教勸佢不如唔好升職，做番財爺算數，但係煲呔就咁回應佢：「我冇得揀㗎﹗」是耶？非耶？八方諗陳主教都未必清楚。
（圖）原來煲呔升職之前曾經搵陳日君傾過偈。
傳真︰2623-9278
電郵︰