雖然本地沙士證實係虛驚一場，但小初竟然同好多師奶散戶一樣，所有貨都被震走晒，皆因小初怕上個星期係星洲，今個禮拜係香港，容乜易下周輪到祖國，到時真係可能走唔切。至於小初係聰明人定係笨伯，好快有答案。
雖然冇貨在手，小初仍繼續睇市，發覺有隻股走勢好怪，就係日東科技（365），自從7月份公布業績蝕4621.6萬元後，冇幾耐股價就一路咁升。
日東老闆早排曾揚言，有信心轉虧為盈。奇就奇在隻股一路升，就有芬佬一路沽，但愈沽就愈升，莫非引證大戶出貨，愈沽愈高？
據講沽日東嘅芬佬並非別人，就係呢排好紅嘅金手指，原本佢哋揸住日東成10%咁多，但最近已經減至5%樓下。
經紀陳話，唔好淨係睇到有人沽貨，點解唔諗吓係乜嘢人接貨？其實金手指手貨唔沽出，新入場嘅大戶亦唔會將股價炒上。
日東股價在一個月內，由0.25元起步，噚日再大升22.65%，收0.65元。
慕容小初