星洲沙士驚魂初定，估唔到咁快又輪到香港出現疑症，雖然只係虛驚一場，但已令港股大幅波動，恒指噚日早段低位10873，最多跌過119點，午後則倒升78點，收11071。
老實講，星洲或香港再現沙士，趙飛雲唔太擔心控制問題，但對於內地則比較擔心。早前有親戚來港，送上家鄉手信菜乾，用半張內地舊報紙包住，趙飛雲看見標題有關野味和沙士，細看內容竟然係話果子狸雖證實是沙士冠狀病毒源頭，但據他們調查所得，和果子狸有密切接觸的人，沙士病發率其實極低，禁吃果子狸其實無必要……。
趙飛雲睇完之後，第一個感覺就係有冇搞錯，第二個感覺就係六月天寒上心頭，怕香港遲早被累多一鋪。
過去兩周，有關沙士消息又再活躍於媒體，雖然近期兩次事件，最後都能逢凶化吉，但陰影始終存在。昨日好友連消帶打將恒指抽回11000之上，恒指補回上周三的下跌裂口11029-10948，並重返10日線之上收市。
以勢論勢，恒指短期將再挑戰今年高位11242，至於是破頂而上，還是以雙頂回落，暫時十分難估，在此關鍵時刻，趙飛雲寧願繼續掛免戰牌，睇通形勢後再出擊。
另一個憂慮是來自美股，杜指及納指近日走勢雖然偏穩，但始終受制於10日線阻力，MACD偏淡，隨時會跌穿20日線，下試50日線的支持。
香港怕沙士，美國怕拉登，對於這類突發性的風險，投資者要玩得安心，自然不宜瞓身。不過師傅教落，凡是可以預期的風險，都不是釀成股災的原因，有時更可能是低吸的良機。
趙飛雲