前晚深夜睇電視新聞報告，聽到香港又有沙士疑案，心裏當堂打個突，成晚冇覺好瞓，好彩只係虛驚一場。昨日早段港股受影響而低開，但沙士疑雲消散後，行情瞬即由低位回升，結果恒指全日重上升78點，以高位11071收市。
大市雖受沙士消息衝擊，但跌唔落，市底真係好強，相信短期有力再向高位推進。藍籌中仍以地產股最硬淨，中國移動（941）亦明顯轉強，對大市有支持。近期推介的股票中，以彩星集團（635）和美聯物業（1200）最勁，前者衝上1.55元，升10%，後者收1.38元，升8.6%，行業前景有利，兩股重可睇好。
8月中推介過華脈無線通信（499），當時股價13.3仙，之後升上18.2仙才出現調整，睇噚日個勢，成個單日轉向格局，只要升破前高位阻力，照度上去，上升目標係23仙。
華脈有消息，委任咗一名非執行董事，本來呢類消息好濕碎，但呢位仁兄嘅背景，就令人有唔少聯想，間公司嘅大動作已呼之欲出。華脈現時透過香港泰信向廣東泰信提供短訊業務的支援服務，噚日宣布委任廣東泰信總經理孫政權為非執行董事，顯示雙方合作有頗大機會推上更高層次。
大家若知道廣東泰信的背景，必然對華脈另眼相看。廣東泰信係廣東省電信實業集團的合營企業，後者則係廣東省電信的全資公司，淨資產值72億元人民幣，年營業額60億元人民幣。華脈現時正全速向高科技及電訊業務轉型，不排除日後廣東省電信會有注資及入股的可能性。
重有一個消息，就係華脈已計劃做路演，同班芬佬見面，相信係為日後連串大動作做好前期推介工作。孫政權的入Board，相信係華脈「升級」的第一步，日後若再有更高層次的動作，對此股確實要另眼相看。
芬佬推介又有新料，話要留意隻滙漢控股（214），現價2.375元，太偏低，遲早會一鳴驚人，甚至翻一番都有好大可能。滙漢做地產同酒店（呢輪呢兩瓣都翻身），每股資產值14.9元，現價折讓84%，即使升上5元，都折讓66%，係咪好抵買？
郭兆誠