向來走迷你小車路線嘅本田Life，自推出以來一直深受車迷歡迎，但礙於推出已有一段時間，或多或少會予人看膩之感，故此廠方便於日前為其推出新一代版本，並以全新面貌示人㖭！
從外觀而言，新版本田Life更見有一份年輕活力感，而大家眼前呢部頂級Turbo型號，更裝有全車包圍及跑車合金軨，望落重帶有點小跑車風采㖭！與此同時，較前更清晰嘅直立式尾燈組合，亦能給予尾隨車輛有清楚明確嘅提示呢！至於車廂方面，不但空間較前有明顯增加，就連座椅承托力亦有所提升，乘坐舒適度十足；設備配搭亦見齊全易用，當然唔少得重有前座雙安全氣袋組合，以確保車上乘客安全啦！
引擎則用上全新660cc直3i-DSI型號，動力輸出充裕之餘，耗油量更只係19.8km/L，而頂級版所採用嘅Turbo偈，更見勁力十足呢！唔知香港嘅車迷，有無機會與其見面呢？
