近排，本地汽車界有不少高層人事變動，令人感到錯愕之餘，重體驗到香港人嗰種適者生存嘅強悍本色㖭！當中，除咗前輩級嘅HenryLeung，加盟汽車平衡進口商嘅富利堡車行外，前萬事得汽車嘅PaulKo，響本地汽車業亦係資歷深厚嘅一員，而早前佢亦毅然加入同屬汽車平衡進口商嘅金濤車行，憑住佢兩位多年嘅管理經驗，相信兩間車行嘅發展，日後會變得更強大同企業化呢！
至於另一邊廂寶馬嘅DouglasChau，過檔英之傑集團旗下，當上GroupB揸Fit人，幾乎已成定案，反而佢離位後，響寶馬懸空嘅GeneralSalesManager一職，外界一直有唔少猜測，及至最近亞Mark收到風，話呢個舉足輕重嘅位置，會由早前從寶馬過檔奧迪，家陣又重投寶馬懷抱嘅EricLeung繼任。唔講唔知，過往Eric響寶馬係負責維修部，對人事管理同寶馬各個車款，可謂暸如指掌，其後佢轉投奧迪，重加深咗對汽車銷售嘅技巧同決策，今回重返寶馬可算係非常稱職呢！