港人天天談論自由行可帶旺零售業，有六家金飾珠寶店，不約而同承租荃灣協和廣場商舖，似乎看好行業前景。負責租務嘅中原商舖部高級營業經理黃培權話，六家金行都係喺過去三日決定承租，全部都係小本經營。
佢哋租嘅舖位，面積由七十至一百二十方呎，月租六千至一萬蚊，舖位面積迷你，黃培權話，因為六家金行，主要係做街坊生意，分行數目唔多。其中三家係荃灣區老牌金行，原區擴充，另三家喺九龍有分店。
由於荃灣眾安街、川龍街同沙咀道一帶，近期定為荃灣金飾坊，區內近二十間珠寶金行，將於九月二十一日開始，聯合附近食肆同零售商舖，展開大型宣傳活動，吸引街坊消費，導致小型金行近日紛紛落實租務決定。
位於川龍街嘅協和廣場，業主早已確定地舖目標租客係金飾、珠寶、鐘表等行業，據黃培權講，六十多間地舖，計埋新租嘅六間金行，已租出十八間。
鰂魚涌逸樺園標榜環保設計，屋苑大堂有唔少窗戶同落地玻璃。噚日開放分層示範單位，發現大單位主人房套廁，浴缸旁邊有個大窗，可以一邊浸浴，一邊欣賞外面景色。呢種設計，通常係貴價分層豪宅，或者獨立屋先至有，屋苑物業比較少。
論價錢，逸樺園同其他貴價豪宅都相差唔遠，發展商早就話，意向呎價要六千蚊，以咁嘅價錢推出，難怪係設計上帶有豪宅嘅影子。
浴室嘅窗不但夠大，而且係曲尺窗，可以望山同樓群。不過，蘭西諗，個窗咁大，唔知隔籬屋會唔會望到沖涼嘅情形呢。
市道好轉，代理自然豐收。今日公布上半年業績嘅美聯物業，噚日已預告今個月上半月嘅生意，係今年以嚟同期最好嘅，截止十四日，已經有七間分行錄得一百萬元佣金，同上個月整個月嘅百萬分行數目睇齊。呢批百萬分行，日前派代表上總行，領取由主席黃建業頒發嘅三千蚊獎金。
過往美聯公布業績，通常由黃主席帶領、執行董事Kitty（葉潔儀）、張錦成，董事郭應龍同埋財政大臣林鳳芳主持。今次由於Kitty同埋郭應龍唔喺香港，由兩名董事陳坤興同埋羅國安上場。
熱賣豪宅新盤薄扶林貝沙灣二期，吸引不少名人參觀。有金牌經理人之稱的陳自強噚日去睇樓，考慮入市。呢個盤除咗銷售神速外，亦帶挈代理荷包火速膨脹。
中原地產陳永傑話，過去兩周，住宅部連同工商舖佣金已突破五千萬元大關，佣金創五年來新高，當中九間分行，佣金破百萬元大關，有咁嘅成績，全靠貝沙灣。
主管李巍講，佢哋半個月做咗十六宗貝沙灣，堪稱貝沙灣之后嘅黃燕芬，個人促成四宗。
成績最突出嘅輝煌臺分行有二百六十五萬佣金，重威過兩年前馬灣珀麗灣單一分行單月過二百萬。聽講，所有過百萬嘅分行，都攞到億元佣金中秋大獎，奪得五千至兩萬蚊獎金。
此外，貝沙灣尚有四十幾個單位，賣得最多嘅代理，可以獨得發展商嘅二萬三千幾蚊獎金。
住宅供應充裕，發展商議價能力自然弱，兼且要不斷諗計，加快去貨速度。點做至好呢？
最近有發展商實行「顧客永遠是對的」手法，盡量滿足買家需要。
蘭西聽市場人士講，有一家大型發展商，可以容許買家埋枱講價，總之唔啱講到啱為止。重有，假如買家買樓後，發覺唔鍾意個單位，買家可以揀過另一個單位。營商手法認真靈活。
蘭西
電郵地址：
