昨日講一啲夠獨立氣概嘅年輕人，刻意擺脫父母影響，行自己嘅路，賓架C位千金，賓架L位公子，皆是如此。當然亦有啲識得時務嘅。財務S位千金，兩年前自美國返港搵工，諗住自己嘅讀書成績驕人，有碩士銜頭，使乜靠老竇搵工？點知寫咗七十封信，見過十八次面試，有兩三次幾乎俾人搵笨之後，仍然似係撞頭埋牆，了無寸進。諗咗一大輪，知道搵食艱難，知道香港已係人求事社會，唔係佢嘅老頭子畢業年代，大學生隨時搵到幾份工嘅時代！
點好呢？S千金做事夠決斷，諗通之後，立即對老頭子講：「NowIcanuseyourconnection!」老頭子見到個女咁醒目，老懷大慰，立即打電話，結果同佢搵到份工。S千金做事努力到加零一，經常朝七晚十，大概佢知道，做工唔衰得，要過得自己先至過得人也。
商界高層管教子女，並不輕鬆，第一怕子女好食懶飛，一味靠屋企；第二，怕子女太過獨立，離家自立，根本唔睬父母；第三，怕佢哋獨立之餘，冇經驗而俾人利用，搞番父母轉頭。如何維持良好兩代關係，等子女有獨立思考能力之餘，亦肯聽吓父母嘅意見和適當照顧，確係好考功夫，而且非一朝一夕可以做得到嘅。唔係擦鞋，睇吓彭志銘次文化堂出版嘅《李氏家訓》，兩位作者引伸李嘉誠片言隻字，十分精采，唔係叫你照單全收，而的確係有參考價值！