Ribavirin對沙士無效，已成定案。但如何對抗沙士重臨，廣州權威鍾南山一槌定音解話：只要好好休息，好好支持，九十三巴仙會完全康復。所以，至緊要唔係特效藥，係支持療法。
諱疾忌醫的人有福了，原來沙士的大敵是自己，闊佬懶理，九成好得番。落重藥的醫管局，成為人命賭盤上的大輸家。因沙士突襲喪命的三百個無辜市民，雖然不是遭利巴韋林謀殺，但肯定就是鍾南山口中那七巴仙唔好彩的病人，無論點醫，都支持唔住，成了沙士冤魂。
既然九十三巴仙病人能自愈，搞隔離病院為乜？沙士病人病情反覆，對藥物反應因人而異，相同病徵是，肺片花晒。個肺無俾人頂過，都會花過十蚊紙鈔票，病人能定過抬油，對醫生說：「放心啦，唔使用藥，我自己會好得番」？信心爆棚是好事，公共醫療支出的重擔馬上舒解，當日沙士懷疑個案迫爆急症室的事件永遠不會重演。
沙士康復者仍受利巴韋林副作用影響健康，他們不是那九十三巴仙的自愈者，好彩亦不屬七巴仙的死者。他們無厘頭染病，100%矇查查中招，但又不屬於這100%病例，非典型得無處話淒涼。沙士暫時無藥可治，病人等於買大細，93%檻過甩難，7%痛失英才。連醫生都像莊家，叫ＩＣＵ病人買定離手；可是，插晒喉的你憑甚麼意志支持住，用自己條命押注？