電腦加WebCam已經非常普遍，人人電腦芒頂都總會有個Cam仔影住，不過外形就來來去去唔係圓形就方形，睇得耐都幾悶。近來就愈嚟愈多玩款嘅WebCam出現，就好似呢款Veo出品，以米奇老鼠揸車嘅WebCam，就咁睇都以為係擺設，不過揭開個「鬼面罩」之後就會露出鏡頭，320×240解像度嘅SONYCCD玩視像之餘更可以當數碼相機拍攝640×480解像度照片。而指揮燈就係狀態顯示燈，不過最得意莫過於車尾死氣喉，改裝成USB插頭，比市面上唔少改車舖更加「鬼斧神工」。米奇老鼠WebCam大人小朋友都啱使，但係售價$480就叫人有點猶豫，不過相信一眾「老鼠迷」都相當樂意捧佢返屋企。
記者、攝影：劉耀祥
查詢：31240341（朗天科技）
