女扮男裝經常都會帶嚟新鮮感，更何況係三個身材標青嘅當紅女星呢！我羅拉早幾日喺日本電視見到米倉涼子、佐藤江梨子同矢田亞希子一齊拍Georgia罐裝咖啡廣告，雖然佢三個都着晒西裝，由頸包到落腳，但睇完都覺得聲色藝俱佳，難怪成為最近話題之作！
先講「聲」方面，呢個廣告嘅主題曲係由米倉、佐藤同矢田合唱，歌詞譯成中文嘅意思，大致上係話：「咁樣嘅Georgia、咁樣嘅Georgia、喺爆滿嘅車廂內都唔飲唔得！」最抵死係呢三位靚女一路飲一路跳舞，對於冇乜跳舞根底嘅佢哋嚟講，真係夠晒攞命，尤其係矢田，拍完即刻話：「聽日啲手腳實痛到死！」
不過佢哋嘅專業態度真係值得一讚，次次跳完會即刻坐低睇帶研究破綻，可惜經常都見到自己嘅醜態，結果三個靚女淨係顧住狂笑！「藝」方面都算合格啦。
至於「色」，就梗係佢哋跳舞嗰陣導演猛咁叫佢哋挺胸收腹嘅鏡頭啦，動作誇張之極！所以話呢，着西裝都可以波濤洶湧㗎！