貿發局總裁施祖祥明年五月先至正式離任，不過，佢預早同主席吳光正講清講楚，雖然到時只有五十八歲，但係唔可以霸住個位唔走，所以唔使留佢。吳主席梗係收到，於是登廣告，搵獵頭公司搵人。
原來係咁，八方重以為佢今年就退下火線。施兄不愧係正統公務員出身，知道搵接班人嘅重要性，所以乜都提早做定，以免到時倒瀉籮蟹，你選中人，人哋都要時間辭職㗎。
以目前嘅進度，下個月理事會或會拍板，然後交特首任命，你都知董生百務纏身，要畀夠時間佢老人家審批。八方多口問施兄，唔係話成日署任嘅副總裁林天福大熱咩？施兄第一時間表明全不知情，皆因佢冇份坐喺搵總裁嘅委員會裏面。
正如佢老兄話齋，好快就有結果，無謂咁多猜測。八方睇吓呢位林副總裁嘅履歷，原來佢亦係政務官出身，八十年代入貿發局，比施兄重耐；呢位福哥今年四十七歲，算打得一族，關鍵係佢湊唔湊得掂吳主席。
施祖祥唔經唔覺喺貿發局做咗七年總裁，佢最開心當然係呢個月初美國商務部頒咗個榮譽狀畀佢同貿發局，讚揚佢對兩地商貿往來嘅貢獻。自從阿爺放水，同香港簽咗CEPA後，貿發局周身唔得閒，要為商界搵商機，施祖祥剛好由北京返港，原來係代主席參加北京市市長國際企業家顧問會議；王岐山做署理市長，但乜都學到足香港，咁多猛料之人排排坐，梗有啲好橋嘅。
傳真︰2623-9278
電郵︰