出名勤力嘅特首董建華，話就話放緊假，其實係周圍去見中國領導人打關係。
八方噚日睇親中報紙，見到喺浙江度假嘅董特首同全國人大委員長李鵬喺錢塘江觀潮，據引述，董特首睇到「激動不已」，歡呼：「八月十八潮，壯觀天下無！」
佢噚晚到咗深圳見國家副主席曾慶紅，今日又暫停放假，喺禮賓府會見德國總統約翰內斯．勞，請佢一行食飯後，又放假到上海玩，順便拜會上海市市長韓正，傾吓兩人共同關心嘅問題。
其實董特首放假期間咁多官式訪問，八方唔明，點解之前特首辦強調因私事關係，唔肯將特首嘅行程公開。特首辦發言人就為老細辯解，話因為各方都畀面董特首，所以先搞到咁多官見佢啫。
傳真︰2623-9278
電郵︰