政務司司長曾蔭權啱啱做完署理特首，今日又馬不停蹄飛去美國訪問九日，去紐約、華盛頓、三藩市同矽谷，介紹香港嘅經濟優勢。
有「煲呔曾」外號嘅司長，今次重會特登帶備幾個印有香港飛龍暗花嘅新煲呔，到時會戴住佢去拜會美國政要，好似國務卿鮑威爾、國家安全事務顧問賴斯，認真巴閉。
煲呔重會見國際信貸評級機構嘅大佬以及聯邦儲備銀行嘅高層，今次佢真係有機會大噴口水，力陳沙士之後嘅香港點好嘢。係人都記得，佢老哥上次去美國，剛好碰上911，所以好辛苦先至返到嚟，希望佢今次順順利利啦。
曾司長日理萬機，佢喺《文匯報》最近嘅訪問入面呻，平時連睇書嘅時間都冇。原來司長鍾情英國浪漫派大詩人拜倫嘅情詩，唔知當年佢有冇寫情詩嚟贏得美人歸呢？
傳真︰2623-9278
電郵︰