梁思浩前日為節目《公德傳遍九龍城》拜神時，大鬧新劇《當四葉草碰上劍尖時》班新人做嘢遲到又唔認真，點知前晚佢同班新人正式錄影節目，就借故向其中兩位新人唐詩詠及戴夢夢狂淋水，唔知係報復定只係開玩笑玩吓咁簡單呢？
前晚錄影節目玩遊戲時，答錯問題就要俾啲奶水照頭淋，當《當》劇嘅新人玩時，連答啱問題梁思浩都特登剪斷條繩淋人，唐詩詠同戴夢夢首當其衝做濕水雞，佢兩個都保持笑容當玩吓，然後返去化妝間吹乾件衫再錄影，點知戴夢夢同唐詩詠又再俾人淋，佢兩個即刻笑唔出。
戴夢夢話：「我濕晒呀，點解又係我哋呀，我冇帶衫換呀，唔玩喇。」唐詩詠仍強裝笑容話：「佢（梁思浩）特登剪㗎，我唔知玩到咁，好彩有着雨褸。」問到覺唔覺得梁思浩特登整蠱佢哋，唐詩詠話：「可能佢想睇唔同反應呢。」戴夢夢就話：「佢玩吓，搞氣氛啫。」
梁思浩就話：「啲水乾淨嘅，我搞氣氛玩吓，唔係報復，放心啦。佢哋班新人見到我都預咗㗎啦。」馮仁昭唔明點解梁思浩重夠膽整蠱人，唔通見過鬼唔怕黑？
此外，《當》劇本周日首播收視低開十六點，比上一周同時段嘅節目跌咗六點，睇怕套劇要搏命谷宣傳喇！
莫文蔚（Karen）日前去咗台灣嘅金門擔任「離島親善大使」，重喺當地做咗個免費簽唱會，但係後來就俾人踢爆咗實則係個人專輯簽唱會，而且重有收錢，噚日Karen喺台灣出現，即刻被人問到有冇睇過呢篇報道，點知Karen起初就話有睇，之後又再話冇睇過，重表現得尷尷尬尬，當再被追問呢啲傳聞嘅時候，Karen就話：「我乜都唔知道，我只係按照公司嘅安排，其他我都唔理。」唔知係咪公司唔記得話佢聽，搞到佢俾人問到口啞啞呢。
上周六晚喺菲律賓有F4成員吳建豪同朱孝天演出嘅一個演唱會，由於現場有太多觀眾喺大門外排隊兼推撞，搞到個大門冧咗落嚟壓親啲fans，之後其他fans重踩過俾大門壓住嘅人衝入場，造成更多人受傷。據報道至少有八個人喺事件中被撞傷，大部份仍然留喺醫院接受治療，不過就冇大礙。
由張智霖同林心如主演嘅台劇《飛刀又見飛刀》噚日喺台灣舉行記者會，林心如因為要拍另一套劇而缺席記者會，搞到導演楊佩佩鬼咁㷫，成個記者會淨係得張智霖跛吓跛吓獨力撐場，張智霖上個月先開完刀，𠵱家一用錯力腳底就流血，咁辛苦都出席記者會，張智霖都算唔話得啦！
陳松伶噚日出席商台活動時，初時都係同大家講吓自己平時鍾意食啲乜，但係唔知點解佢講講吓，就講出佢對環球唱片公司嘅不滿啦。原來松松話出咗新碟之後覺得唱片公司都冇乜做宣傳咁，不過佢最後都好識做咁話：「可能呢個唔做宣傳嘅方法係另一種嘅宣傳手法啦。」唔知呢句係唔係佢嘅真心話呢？
