「一般大閘蟹食法膽固醇會好高，好多女仔又會怕肥唔敢食，將佢同日本菜混埋，就可以食到個味，但係又健康啲。」今次這個中日混戰，絕非換咗個料就算，既要保留大閘蟹嘅膏汁神髓，亦要小心食物混合後容易變壞。不過專心同體貼是Anthony的最大武器，各位OL絕可食得放心！
記者：陳慧敏
攝影：陳盛臣
Model：Calinda（RichStrategyGroupLTD）
初聽Anthony的入行歷程，他說得輕描淡寫一帆風順。「18歲嗰年讀完書冇嘢做周街行，睇見啲日本料理賣相好靚，好有興趣，於是就決定入呢行。」
Anthony去過松凌、凱悅酒店、日航酒店以及日本學師，以為跟開日本師傅學嘢的Anthony一定經歷過「洗菜洗足兩年」、「郁啲就俾師傅鬧」、「太辛苦好想放棄」等青春故事情節，誰知他說：「冇喎！我都有啲一齊學師嘅朋友成日同師傅鬧交、俾師傅一掌打頭嘅經歷，但啲師傅都對我幾好。」記者唔抵得，怎可能如此順利？Anthony想了想：「可能係我夠專心，又夠聽話啦。」
到日本學師半年，說學到甚麼大手法Anthony絕對說不上，不過就從一眾惡師傅處，學到日本廚師要求高同講衞生的工作態度。說到此，怕羞的Anthony即刻變開籠雀：「啲嘢係整畀人食嘅，所有嘢當然要最乾淨，洗碗槽唔可以有菜頭菜尾，每切完一樣嘢都一定要洗刀……嚴？我諗對香港人嚟講，我都算幾嚴幾挑剔。」事隔不久，沉默地跟Model影相的Anthony遙遙望見水吧後有同事「失手」掉了條毛巾落地：「喂！快啲執番佢啦！」反應之快，嚇親小記。
薄到半透明的蘿蔔片包住大閘蟹肉同青瓜絲，好清好寡喎！因為那滿盤的蟹膏汁才是主角，沾一大片，好鮮味呀！
蟹膏、蟹肉、蟹子跟蕎麥麵來一場「混」戰，但用料絕不「係咁意」，原來細心師傅都有其豪氣一面。
將日本蟹膏、大閘蟹膏跟梅醬混在大閘蟹裏面，包上日本紫蘇葉炸成天婦羅，蟹味竟出奇地Sharp，全靠塊紫蘇葉！
大閘蟹肉伴以青瓜、海草、薑絲、芝麻和檸檬；蟹膏是一整嚿的降落在青瓜海草上。嫌日本醋和檸檬將蟹味遮去，沾一點點已經夠醒胃。
主角當然是大閘蟹肉，加上日本海膽、碎拖羅，用青瓜薄片代替紫菜包住，面頭再沾一點黑魚子。嘩！勁矜貴！蟹膏呢？已經混入海鮮堆之中。
今年陽澄湖大閘蟹尚未到港，不過打鑼打鼓的雷射標籤事件，令全港蟹商都對之虎視耽耽。
據銅鑼灣南貨老店老三陽祈小姐指出，因為湖水污染關係，近5年陽澄湖出產的大閘蟹質素已經大不如前，反而太湖出產的大閘蟹才是最甜最多膏，堪稱眾蟹之冠。若果大家仍執着於陽澄湖大閘蟹，就得等二十號前後才有個分曉了！
明日河
電話：22954567
地址：香港中環國際金融中心3019號舖
營業時間：12:00nn-10:30pm（公眾假期休息）
（所有大閘蟹菜式請預早一日預訂）
