在911兩周年，美國本土冇事發生，SARS驚魂已經平息，中秋長假期本港新樓盤銷售不俗，二手盤又個別出現業主封盤及買家追價成交現象，加上本周四公布之就業數據，估計唔會再創新高，刺激芬佬補倉吸納地產股，帶動港股上升，但恒指受制於11000水平，收10992，升109點，成交108億元。
股民於高位觀望情緒濃厚，阿虎經過銀行門口，唔少師奶阿伯圍住大利市機睇股價，但個心就十五十六，唔知落唔落注好。Cookie話，呢種情況喺佢間行同樣出現，散戶始終驚接大戶火棒，話晒手上全都係老本，蝕咗好難搵得番。
華脈無線通信（499）噚日雖逆市回吐，但從近期整體走勢來看，仍屬強勢。黑客話，此股最近頻頻傳出賣殼，重話好事近。聽講有班中資炒家正部署開車，至於消息有幾堅就好難講。
e莉莎話，華脈早前轉攻科網業務，並將非核心業務出售，重組近尾聲。由於發展路向已定，點都有啲創投基金留意，如果市場游資充足，創投基金又肯科水，華脈未必一定要賣盤。
上周四，電視機生產股創維數碼（751）急升，歐資噚日轉追落後嘅TCL（1070），股價大升8%。有歐洲芬佬話，雖然唔睇好TCL手機業務，但睇中佢有中國數碼電視機概念，點都要補番啲貨。
唯冠（334）將設LCD電視生產線，LCD電視機日後將成為主流電視機之一，唯冠隨時會晉身成為高科電視股，而且重可以食埋數碼電視條水。
阿虎