大市調整完成，升勢再起，恒指回升109點，收報10992，成交只有108億元。今次係反彈抑或係新升浪，暫時無法確定，若屬前者，則上到萬一點水平已差唔多，若屬後者，則有力升破11242，再創高位，中期浪頂未出現。
基金雖然睇上個禮拜嘅跌市只係小調整，但對後市睇法則只係審慎樂觀，即係市勢會打橫行，恒指在三兩百點內上落，拖到月底為止。不過，對基金而言，短期大市會否再創高位，意義唔係太大，因為佢哋已預咗中期調整會出現，而調整完成後，大市有9成機會再創今年新高，預期恒指可見12000。
地產股帶動大市升勢，樓市好轉，有售樓數字支持，自由行對樓市有利，已毋庸置疑。大藍籌中，新地（016）仍最突出，高收58.5元，升2.0元，長實（001）升1.75元、恒地（012）同新世界發展（017）分別有3.0%及2.4%進帳。
內地地產股亦發威，首創置業（2868）高收1.87元，大升11.9%；新世界中國（917）則在午市才發力，高收2.2元，升7.3%。新中噚日一升，已衝破上升三角形阻力，並重上10日線之上，照度上去，起碼可見3.2元。
新中在內地擁有龐大土儲，係大地產商之一，佢嘅「位置」可以同香港的新地媲美，只不過佢唔係內地公司，加上係新世界發展旗下，所以一直為投資大眾所忽略。
近期新世界系雖發憤圖強，但新中股價仍係好偏低，甚至重係遠遠低過2001年底的高位2.85元。
地產股股價通常都有折讓，但新中折讓之大，係好唔合理。首創每股資產淨值2.84元，股價折讓34%，新中每股資產淨值12.0元，股價大折讓81.6%！
可以咁講，首創係「成熟」嘅發展商，新中雖然入市早，但到今時今日先進入收成期，由現年度開始（04年6月止），新中盈利肯定可以倍計增長，而股價亦會相對大升。新中現時擁有土儲2.04億方呎，全部位於大城市，足夠未來10年發展之用，這個可以話係新中的「黃金十年」，盈利表現將會脫胎換骨。
郭兆誠